Авто Картинг Клуб "Никола Карев" - Скопје

БОГАТ ТРКАЧКИ ВИКЕНД ВО КИЧЕВО

Одложената трка поради невремето од Сакамото Купот на Македонија во брзински мотоциклизам ќе се одржи на 10 и 11 јули 2010 година на мотодромот во Кичево во организација на Мото Клубот Цобо спорт од Скопје. Како и на првата трка од овој куп натпреварувачите ќе бидат поделени во 5 класи: класа до 80 кубни сантиметри-скутери, до 125, 600 и 1000 кубни сантиметри и класата за аматерите за мотоцикли со зафатнина на моторот 0д 100 до 1100 кубни сантиметри каде право на настап имаат сите мотоциклисти кои поседуваат мотоцикл и опрема, без притоа да е потребно посебно спремање на мотоциклот.
Богатиот тркачки викенд ќе биде збогатен и со првата и втората трка од Шампионатот на Македонија во автомобизилам на кружни патеки кои ќе се возат сабота и недела, а ќе поминат во организација на Авто Картинг Клубот Примо АВЈ од Скопје. Како и до сега натпреварувачите ќе бидат поделени во 6 класи: за возила со зафатнина на моторот до 1150, 1400, 1600, 2000 група Н и СП, 2000 група Хоби и над 2000 кубни сантиметри.
Организаторите напоменуваат дека вратата за влез на патеката ќе биде затворена додека се вози било која сесија на патеката – мото или авто, а капијата ќе биде затварана 15 минути пред почетокот на конкретната сесија, па затоа апелираат за почитување на програмата за натпреварувачкиот викенд која може да ја видите во прилог:

На 30 мај 2010 беше одржана првата трка во брзински мотоциклизам и скутери од Сакамото Купот на Македонија на мотодромот во Кичево. Трката ја обележаа многу нови возачи, омасовување на спортот ширејќи ги границите од досегашните Скопје и Велес, на Гостивар и Кичево, полни класи за бодување и вкупно 21 возач.
Во класата до 80 кубни сантиметри својата доминација од квалификациите ја потврди и во трката возачот на МК Цобо спорт Марин Сугарев, кој со сигурно возење стигна до својата прва победа во кариерата оставајќи ги зад себе Дарко Станковски од МК Спиди ист и Александар Ацевски од МК Мото Велес. Шампионот во оваа класа од минатата година Даниел Блажевски од МК МКД Стрит Фајтерз по за него напорниот викенд мораше да се задоволи само со петото место. На задоволство на љубителите на овој спорт во оваа класа се појавија многу нови возачи, што значи дека во следните години можеме да гледаме се повеќе и повеќе натпреварувачи, земајќи во предвид дека оваа класа треба да биде извор на таленти за другите класи.
Во класата до 125 кубни сантиметри пол-позицијата и победата си ја обезбеди дебитантот во оваа класа Горан Јовановски од МК Мото Велес, кој лани возеше во класата скутери до 150 кубни сантиметри. Пиедесталот со него го поделија второпласираниот Павле Ташковиќ, возач на МК Цобо спорт и уште еден возач кој лани возеше во класата скутери до 80 кубни сантиметри, а годинава прејде во класата до 125, Бранислав Милошевски од МК МКД Стрит Фајтерз.